ដោយ មឿង ទុម
2009-09-11
លោកស្រី មូរ សុខហួរ អ្នកតំណាងរាស្រ្តខ្មែរពីកូតាគណបក្សសមរង្សី នឹងជួបលោកស្រី Hillary Clinton រដ្ឋមន្ត្រីក្រសួងការបរទេសសហរដ្ឋអាមេរិក នៅថ្ងៃសុក្រនេះ នៅរដ្ឋធានីវ៉ាស៊ីនតោន ដើម្បីពិភាក្សាអំពីបញ្ហាការរំលោភសិទ្ធិមនុស្សនិងការរំលោភសេរីភាពនៃការបញ្ចេញមតិនៅកម្ពុជាបច្ចុប្បន្ន។
លោកស្រី មូរ សុខហួរ លើកដៃស្វាគមន៍អ្នកគាំទ្រលោកស្រីដែលប្រមូលផ្ដុំគ្នានៅមុខសាលាដំបូងរាជធានីភ្នំពេញ នាថ្ងៃ២៤ កក្កដា ២០០៩។
លោកស្រី មូរ សុខហួរ ថ្លែងដូច្នេះនៅបន្ទាប់តែ៤ឬ៥ប៉ុន្មានម៉ោងពីពេលដែលលោកស្រីត្រូវបានគណៈកម្មការសិទ្ធិមនុស្ស Tom Lantos នៃសភាអាមេរិក អញ្ជើញឲ្យទៅថ្លែងអំពីបញ្ហានេះជម្រាបជូនសមាជិកសភាអាមេរិកនិងមន្ត្រីអ្នកមុខអ្នកការអាមេរិកមួយចំនួន នៅថ្ងៃជាមួយគ្នានោះ គឺកាលពីម្សិលមិញ ថ្ងៃទី១០ ខែកញ្ញានេះ នៅរដ្ឋធានីវ៉ាស៊ីនតោន។
លោកស្រី ពុង ឈីវកេក ប្រធានអង្គការការពារសិទ្ធិមនុស្សលីកាដូ និងលោក មឿន តុលា ប្រធានកម្មវិធីពលកម្មនៃមជ្ឈមណ្ឌលអប់រំច្បាប់សម្រាប់សហគមន៍ក៏ត្រូវបានគេអញ្ជើញឲ្យទៅចូលរួមដែរ។
លោកស្រី មូរ សុខហួរ បញ្ជាក់ថា ជំនួបទាំងនោះគឺលោកស្រីមានបំណងជំរុញឲ្យរដ្ឋាភិបាលសហរដ្ឋអាមេរិកសហការជាមួយមេដឹកនាំប្រទេសអ្នកកាន់លទ្ធិប្រជាធិបតេយ្យដទៃទៀត រួមគ្នាបង្ហាញជំហរឲ្យបានច្បាស់លាស់ ចំពោះបញ្ហាការរំលោភសិទ្ធិមនុស្សនិងការរំលោភសេរីភាពនៃការបញ្ចេញមតិនៅកម្ពុជាបច្ចុប្បន្ន។
លោកស្រី មូរ សុខហួរ បានមានប្រសាសន៍ថា ៖ «សភាពការណ៍នេះយើងបានបង្ហាញជូនទៅដល់សភានៃសហរដ្ឋអាមេរិកនៅរសៀលនេះហើយ ហើយខ្ញុំឃើញថា មានការបង្ហាញឲ្យឃើញថាគេយកចិត្តទុកដាក់ស្ថានការណ៍លំបាកហើយរឹតតែធ្ងន់ទៅៗ ជាពិសេសដោះស្រាយរឿងសិទ្ធិមនុស្សដែលត្រូវតែឈរលើច្បាប់ លើនីតិរដ្ឋ»។
នៅថ្ងៃសុក្រនេះដែរ លោកស្រី មូរ សុខហួរ ក៏គ្រោងនឹងជួបជាមួយព្រឹទ្ធសភាអាមេរិកដើម្បីពិភាក្សាពីបញ្ហានេះផងដែរឲ្យគេជួយធ្វើអន្តរាគមន៍ដោះស្រាយ។
ខ្មែរអាមេរិកាំងជួបពិភាក្សាគ្នាពីបញ្ហាការរំលោភសិទ្ធិមនុស្សនៅកម្ពុជា
កាលពីយប់ថ្ងៃព្រហស្បតិ៍ ទី១០ ខែកញ្ញា ពលរដ្ឋខ្មែរអាមេរិកាំងជាង៦០នាក់បានទៅជួបជុំគ្នានៅភោជនីយដ្ឋាន Harvest Moon ក្បែររដ្ឋធានីវ៉ាស៊ីនតុន ពិភាក្សាអំពីកង្វល់ជុំវិញបញ្ហាការរំលោភសិទ្ធិមនុស្សនិងការរំលោភសេរីភាពនៃការបញ្ចេញមតិនៅកម្ពុជា។
ពលរដ្ឋខ្មែរអាមេរិកកាំងទាំងប្រុសស្រីនោះមកពីរដ្ឋ Virginia, Maryland, Philadelphia និងរដ្ឋដទៃមួយចំនួនទៀត បានជួបជុំគ្នាកាលពីយប់មិញដោយមានវាគ្មិនកិត្តិយស៣រូប គឺលោកស្រី ពុង ឈីវកេក ប្រធានអង្គការការពារសិទ្ធិមនុស្សលីកាដូ, លោក មឿន តុលា ប្រធានកម្មវិធីពលកម្មនៃមជ្ឈមណ្ឌលអប់រំច្បាប់សម្រាប់សហគមន៍ និងលោកស្រី មូរ សុខហួរ អ្នកតំណាងរាស្ត្រខ្មែរប្រចាំមណ្ឌលខេត្តកំពត។
វាគ្មិនកិត្តិយសទាំង៣រូបបានបញ្ចាំងរូបភាពវីដេអូស្លៃយ៍អំពីព្រឹត្តិការណ៍ជាក់ស្តែងដែលបានកើតមានឡើងលើពលរដ្ឋខ្មែរនៅក្នុងប្រទេសកម្ពុជា ដូចជាទុក្ខវេទនារបស់ពលរដ្ឋខ្មែរអ្នកក្រីក្រដែលរងការបណ្តេញចេញពីដីធ្លី ផ្ទះសម្បែង និងអំពីសកម្មភាពក្រុមប្រដាប់អាវុធប្រើអំពើហិង្សាលើពលរដ្ឋ និងការដែលលោកស្រី មូរ សុខហួរ ឡើងតុលាការក្រុងភ្នំពេញ តបចំពោះបណ្តឹង លោក ហ៊ុន សែន ពីបទបរិហារកេរ្តិ៍។
លោកស្រី ពុង ឈីវកេក បញ្ជាក់ដល់កិច្ចប្រជុំនោះថា សេរីភាពជាមូលដ្ឋានរបស់ពលរដ្ឋខ្មែរនៅកម្ពុជាបច្ចុប្បន្នកំពុងរងការរំលោភគំរាមកំហែង។ ចំណែក លោក មឿន តុលា មានប្រសាសន៍ថា សកម្មជនសហជីពការពារសិទ្ធិកម្មករនៅកម្ពុជាភាគច្រើនរងការគំរាមកំហែង ប្តឹង ឬត្រូវថៅកែក្រុមហ៊ុនដកចេញពីការងារ។
កិច្ចប្រជុំនោះត្រូវបានសមាគមខ្មែរអាមេរិកាំងដើម្បីលទ្ធិប្រជាធិបតេយ្យនិងសិទ្ធិមនុស្ស ឬហៅថា ខារ៉ាត់ រៀបចំឡើងក្នុងបំណងពិនិត្យមើលស្ថានភាពចុងក្រោយនៃបញ្ហាការរំលោភសិទ្ធិមនុស្សនិងការរំលោភសេរីភាពនៃការបញ្ចេញមតិនៅកម្ពុជាដើម្បីអាចឲ្យពលរដ្ឋអាមេរិកអ្នកមានដើមកំណើតខ្មែរអាចចូលរួមជួយដោះស្រាយបញ្ហានេះទៅតាមលទ្ធភាពនិងតាមច្បាប់សហរដ្ឋអាមេរិក៕
Subscribe to:
Post Comments (Atom)
No comments:
Post a Comment