ប៉ុន្មានថ្ងៃ មុនកិច្ចប្រជុំផ្តល់ជំនួយសម្រាប់អភិវឌ្ឍន៍ប្រទេសកម្ពុជា ប្រមុខរដ្ឋាភិបាលលោកនាយករដ្ឋមន្ត្រី ហ៊ុន សែន នៅថ្ងៃព្រហស្បតិ៍នេះ បានព្រមានកុំឲ្យមានការដាក់លក្ខខណ្ឌ ភ្ជាប់នឹងជំនួយសម្រាប់កម្ពុជា។ លោកនាយករដ្ឋមន្ត្រី ហ៊ុន សែន បានប្រៀបធៀបជំនួយរបស់បរទេស សព្វថ្ងៃថា បានដាក់គំនាបច្រើនជាង វត្តមានរបស់អ្នកជំនាញការវៀតណាម នៅលើទឹកដីកម្ពុជា កាលពីទស្សវត្សឆ្នាំ ៨០ ទៅទៀត។
មុខរដ្ឋាភិបាលកម្ពុជា នៅថ្ងៃព្រហស្បតិ៍នេះ បានព្រមានថា រដ្ឋាភិបាល អាចនឹងមិនទទួលយកជំនួយរបស់បរទេស ប្រសិនបើជំនួយណា ដែលផ្តល់ឲ្យកម្ពុជា ភ្ជាប់ជាមួយនឹងលក្ខខណ្ឌសាំញ៉ាំច្រើនដូចសព្វថ្ងៃ។
រំលឹកពីការសម្រេចរបស់រដ្ឋាភិបាល ដែលបានលុបចោលនូវជំនួយរបស់ធនាគារពិភពលោក លើការចុះបញ្ជីដីធ្លី កាលពីដើមខែមុន លោកនាយករដ្ឋមន្ត្រី ហ៊ុន សែន បានគូសបញ្ជាក់ក្នុងខួបលើកទី៣០នៃការបង្កើតធនាគារជាតិនៅព្រឹកមិញ ដោយពាក្យសម្តីខ្លាំងៗថា រដ្ឋាភិបាលស្វាគមន៍នូវការចង់រួមចំណែកអភិវឌ្ឍន៍កម្ពុជា ក៏ប៉ុន្តែម្ចាស់ជំនួយ កុំជ្រៀតជ្រែក និងកុំដាក់សម្ពាធ ភ្ជាប់នឹងជំនួយនោះ។
ជាមួយនឹងអារម្មណ៍ហាក់ដូចជាខឹងសម្បារ លាយឡំនឹងការធុញទ្រាន់លើលក្ខខណ្ឌរបស់ម្ចាស់ជំនួយ នាពេលបច្ចុប្បន្ន លោកនាយករដ្ឋមន្ត្រី បានប្រៀបប្រដូចថា ក្រោយរបបខ្មែរក្រហមដួលរលំ នៅឆ្នាំ១៩៧៩ កងទ័ព និងអ្នកជំនាញការវៀតណាមនៅកម្ពុជា បានគោរពនូវឯករាជ្យរបស់កម្ពុជា។ រាល់សេចក្តីសម្រេចចិត្តខាងនយោបាយ និងសេដ្ឋកិច្ច គឺនៅលើកម្ពុជា ដែលខុសពីសព្វថ្ងៃ។ ជំនួយសព្វថ្ងៃ ដែលអតីតប្រធានក្រុមប្រឹក្សារដ្ឋមន្ត្រី សម័យសាធារណរដ្ឋប្រជាមានិតកម្ពុជា លោកនាយករដ្ឋមន្ត្រី ហ៊ុន សែន សង្កត់ធ្ងន់ថា ទាំងធនាគារពិភពលោក ទាំងមូលនិធិរូបិយវត្ថុអន្តរជាតិ និងទាំងប្រទេសម្ចាស់ជំនួយដទៃទៀត បានចាប់បង្ខំឲ្យរដ្ឋាភិបាល ស្តាប់បង្គាប់ម្តងហើយម្តងទៀត
ជាចុងក្រោយ លោកនាយករដ្ឋមន្ត្រី ក៏បានអំពាវនាវដល់ប្រទេសម្ចាស់ជំនួយ ដែលជាមិត្តភក្តិជួយកម្ពុជា ត្រូវរក្សានូវភាពយោគយល់ និងគោរពភាពជាម្ចាស់របស់កម្ពុជា។
ក្រុមប្រទេសម្ចាស់ជំនួយ ត្រូវជួបប្រជុំជាមួយរដ្ឋាភិបាលកម្ពុជា នៅខែធ្នូ ចុងឆ្នាំនេះ ដើម្បីប្រកាសពីជំនួយ ផ្តល់ឲ្យប្រទេសកម្ពុជា ប្រចាំឆ្នាំ២០១០។ កាលពីកិច្ចប្រជុំលើកមុន ប្រទេសអន្តរជាតិជាដៃគូ បានសម្រេចផ្តល់ជំនួយដល់កម្ពុជានៅឆ្នាំ២០០៩ ជាង ១០០០ លានដុល្លារ។ ប៉ុន្តែកាលពីពេលថ្មីៗនេះ ក្រុមប្រទេសអ្នកផ្តល់ជំនួយ បានប្រជុំគ្នា និងលើកឡើងពីបញ្ហាគោរពសិទ្ធិមនុស្ស ជម្លោះដីធ្លី និងកំណែទម្រង់ប្រព័ន្ធតុលាការ។ ការខ្វះចន្លោះក្នុងការអនុវត្តន៍លើបញ្ហាអាទិភាពទាំងនេះ នឹងត្រូវដាក់លើតុ ក្នុងកិច្ចប្រជុំផ្តល់ជំនួយ នាខែធ្នូខាងមុខ៕
Sunday, October 18, 2009
Subscribe to:
Post Comments (Atom)
No comments:
Post a Comment